Монголбанкнаас иргэд, аж ахуйн нэгжүүдэд ашиглагдаж байсан хуучин дансны дугаарлалт дөрөвдүгээр сарын 1-нээс эхлэн хүчин төгөлдөр бус болж байгааг албан ёсоор зарлалаа. Үүний оронд олон улсад хэрэглэгддэг IBAN буюу олон улсын стандартчилсан дансны дугаарлалттай системийг Монгол Улсад бүрэн нэвтрүүлсэн байна.

Монголбанк 2024 оны аравдугаар сарын 18-нд гаргасан А-242 тоот тушаалаар энэ өөрчлөлтийг албан ёсоор эхлүүлсэн. Энэхүү шийдвэрийг хэрэгжүүлэх хүрээнд Монголбанк нь арилжааны банк болон төлбөрийн системийн бүхий л оролцогч байгууллагуудтай хамтран ажиллаж, IBAN системд бүрэн шилжих ажлыг амжилттай дуусгасан байна.

Шинэ IBAN дугаарлалтын дагуу иргэдийн болон байгууллагуудын үндсэн дансны дугаар өөрчлөгдөхгүй. Харин түүний бүтэц нь улсын код, хяналтын орон, банкны код болон тухайн дансны дугаараас бүрдэх бөгөөд нийтдээ 20 оронтой болж байгаа аж. Энэ нь олон улсад гүйлгээ хийх үед автоматаар танигдаж, ямар банкны данс болохыг илтгэх бөгөөд илүү найдвартай, алдаа багатай, хурдан төлбөр тооцоо хийх боломжтой болжээ.

Шинэ систем нэвтэрснээр гадаад, дотоод гүйлгээнд гарах алдаа багасаж, буруу шилжүүлсэн мөнгийг буцаах эрсдэл багасахын зэрэгцээ иргэд аль банкны данс руу мөнгө явуулж байгаагаа шууд таних боломжтой болсон. Өмнө нь дансны бүтэц банк тус бүрт ялгаатай, ойлгомж муутай байснаас болж буруу шилжүүлэг хийх тохиолдол цөөнгүй гардаг байсан бол одоо тийм эрсдэл мэдэгдэхүйц буурах хүлээлттэй буй нь давуу тал болж байна. Мөн Монгол Улсын санхүүгийн тогтолцоо олон улсын жишигт нийцэж, төлбөр тооцоо илүү ухаалаг, хөнгөн шуурхай болох эхлэл энэ шинэчлэлээр тавигдаж байна.