“Apple” компанийн бүтээсэн “F1” кино дэлхий дахинаа 293 сая ам.долларын орлого олж, тус компанийн кино урлаг дахь хамгийн амжилттай бүтээлээр тодорлоо. Өмнө нь энэ амжилтыг “Napoleon” кино 221 сая ам.долларын орлогоор эзэмшиж байсан ч “F1” уг дээд амжилтыг эвджээ. Тус бүтээл кино театруудаар бүрэн гарч дуусаагүй ч хэдийнэ “Apple”-ийн кино бүтээлийн түүхэн дэх хамгийн өндөр орлоготой бүтээл болсон байна.

“Apple” тус киног “Warner Bros.”-той хамтран бүтээж, IMAX кино театруудаас нийт 60 сая ам.долларын орлого олсон нь нийт орлогынх нь 20 хувийг бүрдүүлж байгаа юм. Зөвхөн АНУ болон Канад дахь IMAX танхимуудаас 27.4 сая ам.долларын тасалбарын орлого олсон нь тухайн бүс нутгийн нийт орлогын 25 хувийг эзэлж байна.

Гэсэн хэдий ч “F1” кино одоогоор ашгийн түвшинд хараахан хүрээгүй бөгөөд үүнд тодорхой хугацаа шаардлагатай гэж шинжээчид үзэж байна. Учир нь киног бүтээх зардал нь 200–300 сая ам.доллар байсан бол маркетинг, сурталчилгаанд нэмэлтээр 100 сая ам.доллар зарцуулжээ. Үүн дээр нэмээд “Apple” “Warner Bros.” болон кино театруудтай орлогоо хуваалцдаг тул ашиг олтлоо багагүй зам туулна хэмээв.

Энэхүү кино төсөл нь “Apple” компанид стратегийн чухал ач холбогдолтой. Тус компани технологийн салбараас хальж, стриминг үйлчилгээнийхээ хажуугаар бүрэн хэмжээний уран сайхны кино бүтээгээд зогсохгүй түүнийгээ олон нийтэд театрын дэлгэцээр амжилттай хүргэж чадахаа нотлон харуулж чаджээ. “Apple”-ийн хувьд энтертайнмент салбар орлогын гол эх үүсвэр биш ч, тэд энэ салбарт идэвхтэй хөрөнгө оруулж, нэр хүнд, нөлөөгөө улам тэлж буй. Үүний тод жишээ нь Оскарын наадмаас шилдэг кино шагнал хүртсэн “Coda”, мөн “Ted Lasso”, “Severance” зэрэг үзэгчдийн сайшаалыг хүртсэн олон ангит бүтээлүүд юм.