Аялагчдын хамгийн түгээмэл ашигладаг платформуудын нэг Tripadvisor компаниас гаргасан 2025 оны "Ил тод байдлын тайлан"-д дурдсанаар, 2024 онд тус платформ дээр нийтлэгдсэн 31.1 сая үнэлгээ, сэтгэгдлийн 8 орчим хувь нь хуурамч байсан нь тогтоогджээ. 

Энэ нь 2022 онд илэрсэнтэй харьцуулахад хоёр дахин их үзүүлэлт боловч зөвхөн хуурамч үнэлгээ, сэтгэгдлийн тоо хоёр дахин нэмэгдсэн гэсэн үг биш гэж Tripadvisor компанийн итгэлцэл ба аюулгүй байдлын албаны дэд ерөнхийлөгч Бекки Фоли тайлбарласан байна.

Фолигийн хэлснээр, вэбсайт руу илгээгдэж буй нийт үнэлгээ, сэтгэгдлийн тоо нэмэгдсэнээс гадна “урамшуулалтай үнэлгээ, сэтгэгдлийн”-ийг илрүүлэх бодлого илүү хатуу, идэвхтэй болсон нь илрүүлэлтийн өсөлтөд нөлөөлжээ. Урамшуулалтай үнэлгээ, сэтгэгдэл гэдэг нь хэрэглэгчид үнэгүй үйлчилгээ, хөнгөлөлт авахын тулд сэтгэл ханамжтай хэмээн сэтгэгдэл бичих эсвэл ажилтнуудын нэрийг дурдсан тохиолдолд шагнал урамшуулал авахыг хэлдэг байна. 

“Ажилтнууд ээж, найз нөхөд, хамаатнуудаа өөрсдийн нэрийг дурдсан үнэлгээ бичүүлдэг. Энэ нь манай олон нийтэд бодит бус, үнэ цэнэ багатай контент бий болгоход хүргэдэг” гэж Фоли хэлжээ.

Хуурамч үнэлгээ, сэтгэгдэл гэж юу вэ?

Tripadvisor-ын тодорхойлолтоор:

“Тухайн үйлчилгээний нэр хүндэд зориудаар нөлөөлөх зорилгоор, нэг талыг барьсан эсвэл биечлэн туршлагагүй хүний бичсэн шүүмжийг хуурамч үнэлгээ, сэтгэгдэл гэж үздэг.”

Tripadvisor хэрхэн хуурамч үнэлгээ, сэтгэгдлийг илрүүлдэг вэ?

Фолигийн хэлснээр, тус платформ нь гурван үе шаттай хяналтын систем ашигладаг:

• Автомат илрүүлэлт
• Хүний хяналт
• Олон нийтийн гомдол, санал 

2024 онд ирсэн бүх үнэлгээ, сэтгэгдлийн 7 хувь нь автоматаар хянагдаж, нийтлэгдэхээс өмнө шууд татгалзагдсан. 

Хуурамч үнэлгээний төрлүүд

Tripadvisor дараах дөрвөн үндсэн ангиллыг ашигладаг:

• Үнэлгээ өсгөх (Boosting) – 54%
• Гишүүний залилан (Member fraud) – 39%
• Санаатайгаар гэмтээх зорилготой сэтгэгдэл (Vandalism)
• Төлбөртэй үнэлгээ (Paid reviews) – 4.8%

Фолигийн онцолсноор, “төлбөртэй үнэлгээ” нь тоо хэмжээгээр бага ч хамгийн “хортой” ангилал юм. Энэ төрлийн сэтгэгдлүүд “сэтгэгдлийн ферм” гэгддэг зохион байгуулалттай бүлгүүдээс гаралтай бөгөөд эдгээр бүлэг бусад төрлийн онлайн залилан үйлддэг хандлагатай. 

2024 онд илрүүлсэн бүх төлбөртэй үнэлгээний гуравны нэгээс илүү нь Индонези болон Вьетнамаас гаралтай үнэлгээ байжээ. Харин 2022 онд гол эх үүсвэр нь Энэтхэг байсан гэж тус тайланд дурджээ.