Эрт амарч, удаан унтдаг өсвөр насны хүүхдүүдийн оюуны чадвар илүү сайн байдаг нь судалгаагаар тогтоогджээ.

3,000 гаруй өсвөр насны хүүхдийг хамруулсан судалгаагаар хамгийн эрт бөгөөд сайн унтдаг, унтаж байх үеийн зүрхний цохилт нь бага байсан хүүхдүүд унших, асуудал шийдэх зэрэг оюуны сорилд бусдаасаа илүү сайн гүйцэтгэл үзүүлжээ. 

Өдөрт дунджаар бусдаасаа ердөө 15 минутаар илүү унтдаг өсвөр насныхан танин мэдэхүйн сорилд илүү өндөр оноо авч, тархины үйл ажиллагаа илүү сайн байсан байна.

Америкийн Нойр Судлалын Академийн зөвлөмжид 13-18 насныхан өдөрт 8-10 цаг унтах ёстой гэж заасан байдаг. 

“Ялангуяа хичээлтэй өдөр хүүхдүүд эрт босох шаардлагатай тул хангалттай нойр авч чаддаггүй, улмаар амралтын өдрүүдэд нойроо нөхөх гэж оролддог. Үүнийг ‘нийгмийн цагийн зөрүү’ гэж нэрлэдэг” хэмээн Нойрны Анагаах Ухааны профессор Колин Эспи тайлбарлав.