Энэтхэгийн баруун нутгаас Лондон руу нисэхээр хөөрсөн Air India компанийн онгоц хөөрөөд хэдхэн хормын дараа осолдож, 241 хүн амиа алдав. Осолдсон онгоц нь Boeing 787 Dreamliner загварынх байсан бөгөөд сүүлийн жилүүдэд болсон хамгийн олон хүний аминд хүрсэн онгоцны осолд тооцогдож байна.
Ямар онгоц байсан бэ?
Осолдсон онгоц нь Boeing 787-8 Dreamliner загварын, урт хугацааны нислэгт зориулсан, хоёр гарц бүхий, түгээмэл хэрэглэгддэг нисэх онгоц юм. Уг онгоц анх 2013 оны арванхоёрдугаар сард анхны туршилтын нислэгээ хийж, 2014 оны нэгдүгээр сард Air India компани хүлээн авчээ.
Air India нийт Boeing 787-8 Dreamliner загварын 34 онгоц ашиглаж байсан ба нэмэлтээр 20 ширхгийг захиалах төлөвлөгөөтэй байсан аж. Одоогийн байдлаар дэлхий даяар 1,100 гаруй Dreamliner ашиглагдаж байна.
Нислэгийн үеэр юу болсон бэ?
Анхны мэдээллээр, онгоцны дохио орон нутгийн цагаар 13:38 цагт буюу хөөрснөөс хойш ердөө нэг минут хүрэхгүй хугацаанд тасарсан гэж Flightradar24 мэдээлжээ. Осолдохоос өмнө онгоц 625 фут (ойролцоогоор 190 метр) өндөрт хүрсэн юм. Онгоц яагаад гэнэт өндрөө алдан, орон сууцны бүс рүү унасан нь тодорхойгүй байна. Осол болох үед тухайн газарт байсан бусад хүмүүс ч мөн амь үрэгдсэн талаар орон нутгийн хэвлэл мэдээлжээ.
Dreamliner-ийн өмнөх асуудлуудтай холбоотой юу?
Энэ нь үйлдвэрлэлийн асуудал гэж бодохгүй байна. Онгоц замаасаа хэвийн хөөрсөн боловч ямар нэг шалтгаанаар өндрөө авч чадаагүй бололтой
Яг одоогоор энэ осол өмнөх үйлдвэрлэлийн доголдолтой холбоотой эсэх нь тодорхойгүй байгаа бөгөөд эцсийн дүгнэлт ирэх жил хүртэл гарахгүй байж болзошгүй. Гэвч мэргэжилтнүүдийн зарим нь үйлдвэрлэлийн асуудал байх магадлал бага гэж үзэж байна. Учир нь осолдсон онгоц 10 гаруй жилийн турш аюулгүй нислэг үйлдэж байжээ. 
