Хийжүүлсэн ундаа, энергийн ундаа нь эрчүүдийн үс уналт болон сэтгэл түгшилтэд нөлөөлдөг байж болзошгүй талаар эмч, судлаачид дурдлаа.  

2023 онд Бээжингийн Цинхуа их сургуулийн судлаачид 18-45 насны 1000 эрэгтэйг дөрвөн сарын турш судалж, чихэрлэг ундааны хэрэглээ болон үс уналтын хоорондын хамаарлыг тогтоожээ. Судалгаагаар долоо хоногт 7-оос дээш удаа чихэрлэг ундаа хэрэглэдэг эрэгтэйчүүд үс уналттай болох магадлал 3.4 дахин өндөр байдаг аж.

Эдгээр ундаа нь их хэмжээний сахар болон нэмэлт бодис агуулдаг бөгөөд энэ нь дааврын тэнцвэрт байдлыг алдагдуулж, үс уналт болон сэтгэл түгшилтийг үүсгэх эрсдэлтэй байдаг байна. Өндөр хэмжээний кофеин нь стрессийн даавар болох кортизолын түвшнийг нэмэгдүүлдэг бол илүүдэл сахар нь цусны эргэлт муудах, үрэвсэл үүсэхэд хүргэж, үсний уутанцар суларч, үс унах эрсдэлийг нэмэгдүүлдэг байна.

Эрэгтэйчүүдийн үс уналт нь нас ахихтай холбоотой байдаг ч, сүүлийн үед залуу эрэгтэйчүүд энэ асуудлаар эмчид хандах нь нэмэгдэж байна. Зарим нь үсний суулгац хийлгэх зэрэг өндөр өртөгтэй арга хэмжээг авч байна. 

Эрэгтэйчүүдийн үс уналтын хамгийн түгээмэл хэлбэр болох андрогенетик алопеци нь дэлхий даяар эрчүүдийн 40-50 хувьд тохиолддог байна. Энэ нь духны үсний шугам ухрах, толгойн орой хэсэгт халцрах зэрэг шинж тэмдгээр илэрдэг. Энэхүү нөхцөл байдал нь генетик болон дааврын түвшний нөлөөгөөр үүсдэг бөгөөд урьдчилан сэргийлэх хамгийн зохимжтой арга бол эрүүл амьдралын хэв маяг юм.