- Хууль бусаар ашиглаж байсан газрын дуудлага худалдаанаас 9.3 тэрбум төгрөгийн орлого олж, нийслэл боловсролын барилгуудын санхүүжилтийг шийдэх эх үүсвэр бүрдүүллээ.
- Сүхбаатар дүүргийн 3150 м.кв талбай бүхий хуучин эмийн үйлдвэрийн газрыг “Эхлэл брэнд” ХХК хамгийн өндөр үнийн санал буюу 9 тэрбум 323 сая төгрөгөөр худалдан авсан байна.
- Энэ орлогыг олон жил санхүүжилтгүй зогссон сургууль, цэцэрлэгийн бүтээн байгуулалтад зарцуулахаар шийдвэрлэжээ.
Нийслэлийн захиргаа олон жил маргаантай байсан өмчийг төрийн бүртгэлд буцаан авч, анхны үнэ 443.5 сая төгрөгөөс эхэлсэн нээлттэй дуудлага худалдаагаар зарсан нь нийтийн өмчийн зөв зарцуулалтыг дэмжин бодит бүтээн байгуулалт хийх эхлэл боллоо. Дуудлага худалдаа нь нийт 27 оролцогчийн дунд өрсөлдөөнтэй явагдсан бөгөөд хамгийн өндөр үнийг “Эхлэл брэнд” ХХК санал болгосон юм.
Газрын байршил нь Сүхбаатар дүүргийн 8-р хороонд, Дашчойлин хийдийн баруун хойно оршдог. Энэ газар өмнө нь Ж.Хатанбаатар нарын этгээдүүд хууль бусаар ашиглаж ирсэн нь тогтоогдож, нийслэлийн өмчид бүртгэгдээд байсан ажээ. Тиймээс нийслэлийн зүгээс газрын ашиглалтын зөрчлийг зогсоож, зах зээлийн эргэлтэд оруулжээ.
Хотын удирдлагууд энэхүү дуудлага худалдааны орлогоор санхүүжилтгүйгээс шалтгаалан олон жил гацсан сургууль, цэцэрлэгийн барилгын ажлыг үргэлжлүүлж, иргэдийн хэрэгцээнд ашиглалтад оруулахаар төлөвлөж байгаа юм. Эдгээр нь хотын захын дүүргүүдэд хэрэгжиж буй боловсролын төсөл, хөтөлбөрүүдийг амилуулах чухал хөрөнгө оруулалт болж байна.
Цаашид нийслэл өмчийн бүртгэл, ашиглалтын ил тод байдлыг сайжруулах, хууль бусаар ашигласан хөрөнгийг эргүүлэн авах бодлогыг тууштай үргэлжлүүлнэ гэж нийслэлийн удирдлагууд мэдэгдэж байна 
