Дэлхийн хамгийн чинээлэг хүмүүсийн нэг Жефф Безосын хурим өнгөрсөн долоо хоногт Италийн Венец хотноо гурван өдрийн турш үргэлжилж, дэлхийн хэмжээний од, бизнес эрхмүүдийг цуглуулсан томоохон шоу болж хувирлаа.

Тэрбумтнуудын оролцоотой, 50 сая долларын өртөг бүхий хурим нь Сан Жоржио Мажоре хэмээх хувийн арал дээр зангиатай ёслолоор эхэлсэн бөгөөд Лорен Санчестай гэр бүл болсон Безосын гол хуримын хүлээн авалтыг Венецийн зүүн хэсгийн хамгаалалттай бүс болох Арсенале цогцолборт зохион байгуулжээ. Уг байршлыг анх төлөвлөсөн 16-р зууны дурсгалт байраас аюулгүй байдлын шалтгаанаар сүүлчийн мөчид өөрчилсөн байна.

Хуримын үйл ажиллагаа эхлэхээс өмнөх орой Мадонна делл Орто сүмийн хашаанд угтах хүлээн авалт болсон бөгөөд мөн хөөсөөр наадах үдэшлэг, “Агуу Гэтсбигийн” сэдэвт үдэшлэг гэх мэт нэмэлт арга хэмжээнүүд зохион байгуулагдсан байна.

Хуримд АНУ-ын Ерөнхийлөгч Дональд Трампын охин Иванка Трамп, нөхөр Жаред Кушнер, Билл Гэйтс, Опра Уинфри, Леонардо ДиКаприо, дуучин Usher, Кардашьяны гэр бүлийн гишүүд зэрэг 200 гаруй алдартан оролцсон байна.

Зочдын ихэнх нь Венецийн тансаг зочид буудлууд болох Чиприани, Аман зэрэг газруудад байрласан бөгөөд тэд хувийн онгоц, тансаг завь, нисдэг тэргээр хүрэлцэн иржээ.

Гэвч энэ тансаг хурим нь орон нутгийн оршин суугчид болон байгаль хамгаалагчдын эсэргүүцэлтэй тулгарсан юм. ЮНЕСКО-гийн дэлхийн өвд бүртгэлтэй Венец хот жуулчдын хэт ачааллаас болж аль хэдийн дарамтад орсон бөгөөд хотын эрх баригчид өнгөрсөн жил жуулчны төлбөр тогтоосон анхны хот болж байв.

Италид сүүлийн үед баячууд ихээр нүүж ирж байгаа бөгөөд энэ нь тус улсын өндөр орлоготой хүмүүст зориулсан татварын ээлтэй бодлого, тансаг үл хөдлөх хөрөнгийн өсөлттэй холбоотой юм. Безосын хурим ч энэ хандлагын тод жишээ болон хувирлаа. Безос хуримын хүрээнд орон нутгийн шинжлэх ухааны байгууллага болох Corila-д 2 сая еврогийн хандив өгөхөөр төлөвлөж байгаа талаар мөн мэдээлжээ.