Баасан гарагийн өглөө АНУ-ын гол индексүүдийн фьючерс өсөлттэй эхэлсэн ч хөрөнгө оруулагчид худалдааны тарифын асуудлаас шалтгаалсан тогтворгүй долоо хоногийг үдэхээр бэлдэж байна.

S&P 500 индексийн фьючерс 0.65%, Nasdaq 100 0.75%, Dow Jones-ийн фьючерс 196 оноогоор буюу 0.49 хувиар өсөв. Гэсэн хэдий ч пүрэв гарагт S&P 500 огцом 3.46% унаж, Dow Jones 1,014 пунктээр буурсан бол Nasdaq 4.31%-ийн уналт үзүүлэв.

Уг уналтын гол шалтгаан нь мэдээж Ерөнхийлөгч Дональд Трампын тарифын шинэ бодлого байлаа. Хятадаас импортлох бүх бараанд 145 хувийн тариф оногдуулж байгааг Цагаан ордон албан ёсоор баталсан. Бусад орнуудаас оруулж буй бараанд 10%-ийн нийтлэг тариф ногдуулсан бол Канад, Мексикийн зарим бараанд 25%-ийн тариф хэвээр үлдсэн байна.

Argent Capital Management-ийн хөрөнгө оруулалтын менежер Жед Эллербрук “Тарифын түвшин буурсан мэт харагдаж болох ч гурван сарын хугацааны хөнгөлөлт нь бизнес, хөрөнгө оруулагчдын хувьд тодорхой бус байдлыг арилгаж чадахгүй. Энэ нь АНУ-д өндөр инфляц, удааширсан эдийн засаг, тогтворгүй хөрөнгийн зах зээлийг авчрах болно” гэж дүгнэв.

Хэдий пүрэв гарагийн уналт хүчтэй байсан ч нийт долоо хоногийн хувьд индексүүд өсөлттэй байна. S&P 500 энэ долоо хоногт 3.8%-ийн өсөлт үзүүлж, өнгөрсөн арваннэгдүгээр сараас хойших хамгийн сайн гүйцэтгэлийг харуулж байна. Nasdaq 5.1%, Dow Jones 3.3%-ийн өсөлттэй байгаа юм.

Энэ долоо хоногийн зах зээлийн дараагийн анхаарал татах гол үйл явдал бол санхүүгийн салбарын компаниудын эхний улирлын тайлан бөгөөд Morgan Stanley, JPMorgan Chase, Wells Fargo болон BlackRock зэрэг томоохон банкууд тайлангаа танилцуулах хуваарьтай байна. Үүнтэй зэрэгцэн гуравдугаар сарын үйлдвэрлэгчийн үнийн индекс болон дөрөвдүгээр сарын хэрэглэгчийн төлөв байдлын урьдчилсан үзүүлэлтүүд нийтлэгдэх юм.