Дэлхийн Банк цөмийн эрчим хүчний төслүүдийг санхүүжүүлэх олон жилийн хориг бодлогоо цуцалж, хөгжиж буй орнуудын эрчим хүчний ирээдүйд шинэ эх үүсвэр нээх шийдвэр гаргалаа. Уг өөрчлөлт нь дэлхийн цахилгаан эрчим хүчний эрэлт түүхэндээ байгаагүй хурдацтай өсөж байгаа үед хийгдэж буй стратегийн шинэчлэлийн нэг хэсэг юм.

Энэхүү шийдвэрийг тус банкны Удирдах зөвлөл зургадугаар сарын 10-нд хэлэлцэж, Ерөнхийлөгч Ажай Банга “үр бүтээлтэй хэлэлцүүлэг”-ийн дүнд баталсныг маргааш нь албан ёсоор зарласан. Тэрбээр цөмийн эрчим хүчний талаарх байр суурь тодорхой болсон ч байгалийн хийн олборлолтыг санхүүжүүлэх эсэх асуудал үргэлжлэн хэлэлцэгдэх шаардлагатай байгааг онцолсон байна.

Дэлхийн Банк 2013 оноос хойш цөмийн эрчим хүчний төслүүдэд хөрөнгө оруулахгүй гэдгээ илэрхийлж, 2017 онд хөдлөх хөрөнгийн шатахуун буюу нефть, хийн анхан шатны олборлолтыг 2019 оноос эхлэн дэмжихгүй байхаар шийдээд байсан юм. Гэвч 2035 он гэхэд дэлхийн хөгжиж буй олон улсын цахилгаан хэрэглээ хоёр дахин нэмэгдэх урьдчилсан тооцооны улмаас тус банк бодлогоо эргэн харж, цөмийн эрчим хүчийг дэмжих “нийт багцын” стратегийг хэрэгжүүлэхээр болжээ.

Шинэ стратегийн хүрээнд тус банк Олон улсын атомын эрчим хүчний агентлагтай хамтран аюулгүй байдал, зэвсэг үл дэлгэрүүлэх зохицуулалтыг боловсронгуй болгохоос гадна одоо ашиглаж буй атомын станцуудын насжилтыг сунгах, цахилгаан сүлжээг шинэчлэх, жижиг хэмжээний модуль реактор нэвтрүүлэх зэрэг олон чиглэлд хөрөнгө оруулахаар төлөвлөж байна.

АНУ тус банкны 15.83 хувийн саналын эрхтэй хамгийн том хувь эзэмшигч бөгөөд олон жилийн турш цөмийн эрчим хүчийг эргүүлэн санхүүжүүлэх бодлогыг тууштай дэмжиж ирсэн. Тус улсын шахалтаар энэ удаагийн бодлогын эргэлт биеллээ олсон гэж шинжээчид үзэж байна. Ялангуяа Дональд Трампын засаг захиргааны үед АНУ цөмийн технологийг экспортлох, санхүүжүүлэх бодлогыг эрчимтэй дэмжиж байжээ.

Гэсэн ч байгалийн хийн санхүүжилтийн асуудал одоогоор шийдэгдээгүй хэвээр байна. Тухайлбал, Герман, Франц, Их Британи зэрэг Европын орнууд байгалийн хийн олборлолтыг дахин дэмжих нь уур амьсгалын зорилгоос ухарсан алхам болох вий хэмээн болгоомжилж буйг эх сурвалжууд онцолжээ. Харин нөгөө талд зарим улс орнууд байгалийн хийг “шилжилтийн түлш” хэмээн нэрлэж, сэргээгдэх эх үүсвэрт суурилсан тогтолцоонд хүрэх завсрын шат гэж үзэж байна.

Барбадосын Ерөнхий сайд Миа Моттли “цэвэр эрчим хүч гэсэн нэр томьёо нь заавал чулуужсан түлшгүй байхыг шаарддаггүй” хэмээн мэдэгдсэн нь энэ үзэл бодлыг бататгасан байр суурь гэж үзэж болно.

Дэлхийн банкны Ерөнхийлөгч Банга тус банкны шинэ стратеги нь шийдвэр гаргах хугацааг богиносгож, илүү үр ашигтай санхүүжилт хийх боломжийг бүрдүүлж, улс орнуудад эрчим хүчний нарийн төвөгтэй орчинд үр дүнтэй шийдэл гаргахад тусална гэж дүгнэсэн байна.