Apple компанийн шинэ үйлдлийн систем болох iOS 26-ын албан бус мэдээллүүд “Дэлхийн хөгжүүлэгчдийн чуулган”-ы өмнө задарч, AirPods-д ирэх технологийн шинэчлэлүүд олон нийтэд ил боллоо. Энэхүү мэдээллийн эх сурвалж болох 9to5Mac сайтын мэдээлснээр AirPods хэрэглэгчид тун удахгүй утсандаа гар хүрэлгүйгээр илүү олон үйлдэл хийх боломжтой болох аж.

Хамгийн анхаарал татаж буй шинэчлэлт бол AirPods-оор iPhone-ийн камерыг удирдах боломж юм. Хэрэглэгч AirPods-ийн иш хэсгийг дарснаар зураг дарж болох энэ функц нь өмнө зөвхөн EarPods-д байсан бөгөөд анх удаа жинхэнэ утасгүй чихэвчид нэвтрэх гэж байна. Уг шийдэл нь зураг авах туршлагыг илүү эвтэйхэн, гарыг чөлөөтэй болгож, хэрэглэгчийн хөдөлгөөнийг хязгаарлахгүй гэдгээрээ онцлог ажээ.

Толгой хөдөлгөх дохионы хэрэглээ мөн өргөжинө. 2024 онд AirPods Pro 2 болон AirPods 4 загваруудад анх нэвтэрсэн энэхүү технологиор хэрэглэгч толгойгоо зүүн, баруун тийш эргүүлж дуудлага хүлээн авах, эсвэл мессеж унших боломжтой болсон. Харин iOS 26 хувилбар дээр ярианы үеийн дуу чимээний тохиргоог толгойн хөдөлгөөнөөр зогсоох эсвэл сунгах шинэ үйлдлүүд нэмэгдэх хүлээлттэй байна.

iOS 26 нь үүгээр зогсохгүй AirPods-д хэд хэдэн шинэлэг функц нэмэхээр байна. Үүнд хэрэглэгч унтах үед агуулгыг автоматаар зогсоох “унтах мэдрэгч” орж байгаа нь подкаст, хөгжим сонсож байх үед тайван амрах боломжийг бүрдүүлнэ. Мөн дуу бичлэгийн чанарыг сайжруулах “студийн микрофон” горим нэмэгдэж, iPhone-ийн “Audio Mix”-ийн түвшинд хүрэх хүлээлттэй байна. Түүнчлэн AirPods-ийг Apple төхөөрөмжүүдтэй холбох үйл явцыг илүү хурдан, алдаагүй болгох сайжруулалт хийгджээ.

Apple компани дээрх бүх шинэ боломжуудыг 2025 оны зургадугаар сарын 9-нд болох хөгжүүлэгчдийн WWDC арга хэмжээнд танилцуулах төлөвтэй байгаа. Техникийн хувьд улам боловсронгуй болж буй AirPods шинэчлэлтүүд нь хэрэглэгчдэд зөвхөн дуу сонсох хэрэгсэл бус, өдөр тутмын ухаалаг туслах болох замыг нээж байна. Apple-ийн хувьд энэ нь програм хангамжийн чадавхийг техник төхөөрөмжтэй уялдуулах дараагийн том алхам болж магадгүй байна.