Нийслэлийн хэмжээнд гол, усны ослоос урьдчилан сэргийлэх зорилгоор завьт болон хөдөлгөөнт эргүүлүүд ажилдаа гарлаа. Энэ нь нийслэлийн Засаг даргын 2025 оны “Гол, усны ослоос урьдчилан сэргийлэх талаар авах зарим арга хэмжээний тухай” захирамжийн хүрээнд хэрэгжиж буй юм.

Энэ жил Туул, Тэрэлж, Хэрлэн голын эрэг дагуу есөн чиглэлд эргүүл байршуулсан бөгөөд анх удаа Сэлбэ голын дагуу ч мөн хөдөлгөөнт эргүүл ажиллуулахаар шийдвэрлэжээ. Тус арга хэмжээг нийслэлийн Онцгой байдлын газар, Цагдаагийн удирдах газар болон дүүргүүдийн Хүүхэд, гэр бүлийн хөгжлийн хэлтсүүд хамтран зохион байгуулж байгаа юм.

Эргүүлүүд есдүгээр сарын 21-ний өдөр хүртэл идэвхтэй ажиллаж, усны эрсдэлтэй бүсүүдэд хяналт тавих, иргэдэд сэрэмжлүүлэг хүргэх, болзошгүй ослын үед авран хамгаалах үүрэгтэй ажээ. Энэ нь зундаа гол дагуух амралт, зугаалгын ачаалал нэмэгддэгтэй холбоотойгоор авсан урьдчилан сэргийлэх чухал алхам гэж холбогдох байгууллагууд онцолж байна.

Нийслэлийн хэмжээнд энэ төрлийн завьт болон хөдөлгөөнт эргүүл анх 2010 оноос ажиллаж эхэлсэн бөгөөд өнөө жил 15 дахь удаагаа зохион байгуулагдаж буйгаараа онцлогтой. Урин дулаан улиралд хүүхэд, залуусын аюулгүй байдалд онцгой анхаарч, усанд осолдохоос урьдчилан сэргийлэх чиглэлээр нийслэлийн хэмжээнд тогтмол хяналт, урьдчилан сэргийлэх ажил хэрэгжүүлж буйг албаныхан тэмдэглэлээ.